വെബ് പേജുകള്‍ തയ്യാറാക്കാനുള്ള ഭാഷയാണല്ലോ എച്ച്ടിഎംഎല്‍ (ഹൈപ്പര്‍ടെക്സ്റ്റ് മാര്‍ക്കപ്പ് ലാംഗ്വേജ്). ഇതിന്റെ ഏറ്റവും പുതിയ ഔദ്യോഗികപതിപ്പാണ് എച്ച്ടിഎംഎല്‍ 5. പൊതുവേ പറയുമ്പോള്‍ എച്ച്ടിഎംഎല്‍ ഭാഷയുടെ പുതിയ പതിപ്പ് എന്നതിനപ്പുറം സിഎസ്എസ്സും ജാവാസ്ക്രിപ്റ്റുമടക്കം അനുബന്ധസേവനങ്ങളില്‍ വന്ന മാറ്റങ്ങള്‍കൂടി ഇതില്‍പ്പെടും.
2007-2008 കാലത്താണ് ഇതിന്റെ കരടുരൂപം തയ്യാറാക്കാനാരംഭിച്ചത്. 2014-ല്‍ ഔദ്യോഗികസ്റ്റാന്‍ഡേഡ് നിലവില്‍വന്നു. ഇപ്പോള്‍ എല്ലാ പ്രമുഖ ബ്രൗസറുകളും എച്ച്ടിഎംഎല്‍ 5-ന്റെ പ്രധാനസവിശേഷതകള്‍ പിന്തുണയ്ക്കുന്നുണ്ട്. ഫ്ലാഷിന്റെയും ഒരുപരിധിവരെ ജാവാ അപ്പ്‌ലറ്റുകളുടെയും ആവശ്യകത ഇല്ലാതാക്കാന്‍ എച്ച്ടിഎംഎല്‍ 5-ന് കഴിഞ്ഞു.
അര്‍ത്ഥത്തിലൂന്നിയ സെമാന്റിക് മാര്‍ക്കപ്പ് (Semantic Markup) കൊണ്ടുവന്നു എന്നത് ഈ പതിപ്പിന്റെ വലിയൊരു നേട്ടമാണ്. ഇതിന്റെ ഭാഗമാണ് <main>, <section>, <article>, <header>, <footer> തുടങ്ങിയ ടാഗുകള്‍.
വെബ് പേജുകളില്‍ ശബ്ദവും ദൃശ്യവും കൊണ്ടുവരാന്‍ ഫ്ലാഷ് പോലുള്ള ബാഹ്യസേവനങ്ങള്‍ ഉപയോഗിയ്ക്കേണ്ട അവസ്ഥ ഇല്ലാതാക്കി എന്നതാണ് ഇതിന്റെ മറ്റൊരു വലിയ പ്രത്യേകത. <audio>, <video> എന്നീ ലളിതമായ ടാഗുകളിലൂടെ വെബ് പേജില്‍ ശബ്ദവും ദൃശ്യവും കൊണ്ടുവരാം.
വെബ് ആപ്പുകള്‍ നിര്‍മിക്കാന്‍ ഏറെ സഹായകമായ നല്ലൊരു എപിഐയും ഇതിന്റെ ഭാഗമായുണ്ട്. സോഫ്റ്റ്‌വെയര്‍ ആപ്ലിക്കേഷനുകള്‍ നിര്‍മ്മിയ്ക്കുന്നത് എളുപ്പമാക്കുന്ന സങ്കേതമാണ് 'എപിഐ' അഥവാ 'ആപ്ലിക്കേഷന്‍ പ്രോഗ്രാമിങ് ഇന്റര്‍ഫെയ്സ്'. ക്യാന്‍വാസ്, ഡ്രാഗ്-ആന്റ്-ഡ്രോപ്പ്, വെബ് സ്റ്റോറേജ്, ജിയോലൊക്കേഷന്‍, ഡോക്യുമെന്റ് എഡിറ്റിങ് എന്നീ സംവിധാനങ്ങളെല്ലാം ഈ എപിഐയുടെ പ്രസക്തഭാഗങ്ങളാണ്.
ഫ്ലാഷ് ഒരു കമ്പനിയുടെ ഉത്പന്നമാണ് (ഇപ്പോള്‍ അഡോബിയുടെ). എന്നാല്‍ എച്ച്ടിഎംഎല്‍ 5 ആരു അന്താരാഷ്ട്രസ്റ്റാന്‍ഡേഡാണ്. വേള്‍ഡ് വൈഡ് വെബ് കണ്‍സോര്‍ഷ്യം (W3C) ആണ് അത് നോക്കിനടത്തുന്നത്. അതുകൊണ്ടുതന്നെ ജനകീയമായ ഒരു വെബ് പടുത്തുയര്‍ത്താന്‍ എന്തുകൊണ്ടും നല്ലത് എച്ച്ടിഎംഎല്‍ 5 ആണ്. സാങ്കേതികമേന്മകൊണ്ടും ഇത് ഫ്ലാഷിനെ പിന്നിലാക്കിത്തുടങ്ങിയിരിക്കുന്നു.
വെബ് ഡിസൈനിങ് പഠിച്ചുതുടങ്ങുന്നവരുടെയും പഠിപ്പിക്കുന്നവരുടെയും ഇഷ്ട ടാഗുകളായിരുന്നു <marquee>, <blink> എന്നിവ. ഫ്ലാഷ് ന്യൂസ് മാതൃകയില്‍ സ്ക്രീനിന്റെ ഒരറ്റത്തുനിന്ന് മറ്റേയറ്റത്തേക്ക് എഴുത്ത് ചലിപ്പിക്കാനുള്ളതാനാണ് മാര്‍ക്യു.
ഏതായാലും ഈ ടാഗുകള്‍ എച്ച്ടിഎംഎല്‍ സ്റ്റാന്‍ഡേര്‍ഡിന്റെ ഭാഗമല്ല. ബ്രൗസര്‍ യുദ്ധത്തിന്റെ ഭാഗമായി നെറ്റ്സ്കെയ്പ് അവതരിപ്പിച്ചതാണ് ബ്ലിങ്ക് ടാഗ്. ഇതിന് ഇന്റര്‍നെറ്റ് എക്സ്പ്ലോററിന്റെ മറുപടിയായിരുന്നു മാര്‍ക്യു.
വായനയ്ക്ക് തടസ്സം നില്‍ക്കുന്ന ഇത്തരം അലങ്കാരങ്ങള്‍ (അലങ്കോലങ്ങള്‍) ഡബ്ല്യുത്രീസീ അടക്കം വിവരമുള്ളവരാരും തന്നെ പ്രോത്സാഹിപ്പിക്കുന്നില്ല. ഇനിയും മാറാത്ത സര്‍ക്കാര്‍ സൈറ്റുകളില്‍ മാര്‍ക്യു കാണാം. ഇവയിലെ ലിങ്കുകള്‍ ക്ലിക്ക് ചെയ്യാനുള്ള ബുദ്ധിമുട്ട് ചില്ലറയല്ല.
ബ്ലിങ്ക് ടാഗ് ഇപ്പോള്‍തന്നെ ഉപയോഗശൂന്യമാണ്. മാര്‍ക്യൂ മിക്ക ബ്രൗസറുകളും പിന്തുണയ്ക്കുന്നുണ്ട്. എന്നാല്‍ ഈ പിന്തുണ എപ്പോള്‍ വേണമെങ്കിലും എടുത്തുകളയാം. ഏതെങ്കിലും കാരണവശാല്‍ ബ്ലിങ്കിനോ മാര്‍ക്യൂവിനോ സമാനമായ പ്രതീതിയുളവാക്കേണ്ടിവന്നാല്‍ സിഎസ്എസ് അനിമേഷനുകളോ ജാവാ സ്ക്രിപ്റ്റോ ഉപയോഗിക്കാം.